Friday, October 26, 2007

أول مشكلة

دى اول مشكلة تيجي للمدونة
واخونا بيقول


انا متضايق علشان انا بسامح اللى بيظلمنى واحيانا اعتذر له لدرجة انه بعد كده بيرجع يقولى فاكر لما غلطت فيا
ورجعت اعتذرت ..ساعتها بندم انى سامحته لانه اعتبر اعتذارى انى غلطان بينما انا كنت بعتذر علشان ألم الموضوع وما يوسعش ..وبالرغم من ان ده شئ بيضايقنى لكنى مش حاسس انه مشكلة ..عادى لانى سامحتهم لوجه الله هم اللى عندهم مشكلة مش انا

4 comments:

ftataljanna said...

بسم الله الرحمن الرحيم
والصلاة والسلام على اشرف المرسلين سيدنا محمد وعلى آله وصحبه اجمعين

اما بعد

فى قصة قريتها حلوة اوى

كان فى واحد راح حديقة الحيوان لقى مكتوب جانب قفص الاسد خطر لا تقترب او تدخل يديك فى القفص

الراجل لما قرا الجملة دى قال طيب والاسد هايؤذيني ليه انا عمرى ما اذيته
ودخل ايده فى القفص فالاسد هجم عليها وسبب له جرح خطير المهم انقذوه وجت سليمة

بعد لما الراجل خرج من المستشفى راح تانى عند قفص الاسد وقال له انا مسامحك انت ماكنتش عارف انى بس عايز العب معاك انت اكيد ماكانتش قصدك تؤذيني

ودخل ايديه تانى

المرة دى بقى ايديه اتقطعت

لما رجع تالت مرة عند قفص الاسد قال له انا مسامحك خلاص بس المرة دى انا عرفت انى مش هادخل ايدي عندك تانى


التسامح فى حد ذاته صفة الكرماء بس مش معنى كده انك لما تسامح حد على ظلمه ليك او على غلطه فى حقك انك ترجع تتعامل معاه زى الاول

المفروض تعرف انه ماتدخلش ايدك جوه القفص تانى

لو كنت بعد ما سامحت الانسان ده رسمت حدود التعامل بينك وبينه من اول وجديد اكيد ماكانش هايقدر يقول لك كده او يضايقك بان انت اللى اعتذرت له

المهم

ان حضرتك ماتتضايقش لانك سامحت حد لانك لما بتسامح مش بتسامح لان الانسان ده يستاهل
انت بتتسامح لانك عايز ربنا يسامحك ولان انت انسان كريم
غير كده الانسان لما بيعتذر دى حاجة مش بتقلل من قيمته بالعكس دى حاجة بتدل على انه انسان مسؤول
لانه لو كان غلطان فهو عرف غلطته وبالتالى اعتذر عنها
ولو بيعتذر علشان يلم الموضوع فده لانه انسان عاقل ومش بيدي الامور اكبر من حجمها
انك انسان بتعتذر ايا كان السبب دي حاجة ليك مش عليك دى تخليك تكبر فى نظر نفسك مش تندم

اما بقى عن الانسان اللى بيفكرك انك اعتذرت له لما غلطت

فدى حاجة توجب عليه انه يبقى عارف انك لو غلطت فى اى وقت ايا كان هاتعتذر فبالتالى لما ترفض تعتذر يبقى اكيد انت ما غلطتش فيه المرة دى :)

ماتهتمش للناس اللى بيفكروك بهفواتك لانه واجب عليهم يفتكروا هفواتهم ده على اساس انه الاعتذار بالنسبة لهم هفوة

خليك زي ما انت سامح علشان ربنا يسامحك مش لان الناس تستاهل

محمد عبد الرحمن said...

سيبك منه ومن أفكاره تجاهك إنت تسامح فى غير ضعف وطبعا اللى بيسامح بيكون أقوى عشان كده بلاش تشغل بالك بيه
أما موضوع الإعتذار ده مش شايف له لزوم لو إنت متأكد إنك مش غلطان وكفاية لو سامحته إنك تقولله كده أنت غلطت فى كذا وأنا سامحتك ده لو كرر الغلط أو تمادى فيه أما من أول مرة سيب نظراتك تكلمه وتعرفه إنك غلطان

التسامح مش تفريط فى الحقوق ولا مرمطة للكرامة العكس التسامح موقف قوى ومبادر وإيجابى ولازم يثمر ثمرة بناء أخلاقية وإلا تحول تهاونا وضعفا وحاجات سلبية كتيييير

Anonymous said...

بسم الله الرحمن الرحيم

السلام عليكم و رحمة الله و بركاته

اولا احب اشكر اختي الكريمة على المدونة المفيدة دي

و ان شاء الله تفيد ناس كتير

بالنسبة للمشكلة المطروحة

اعتقد ان الاخ الكريم يعمل الشيء الصحيح و خلاص

انت تسامح و تكسب ثواب اما اللي مايقدرش عملك ده و يعتبره ضعف فخليه هو اللي يتحمل الذنب

لكن برضه تسامحه مرة و اتنين بس اذا تمادى فحاول ان تبتعد عنه و كفاك ان سامحته كثيرا ... ادعو له فقط بالهداية الى الطريق الارشد

احساس لسه حى said...

عزيزى
لما بنسامح اللى بيغلط فينا اكيد بنشجعه على انه يغلط فى حد تانى
خلينا نسامح بينا وبين اللى خلقنا بس لازم اى فعل من حد يكون لينا فيه رد فعل واضح وحاسم
تحياتى
سلام