اخى الاستاذ الباحث عن الحقيقة تفضل مشكورا بانه حلل مشكلة مدونة مشكلة وحلها فى كومينت وانا هاقول المشاكل دى و حلها او تحليلي لها
اولا: سنك صغير ..وده مؤثر جدا ازاى انا ياللى عندى ...سنه ابعت لاختى الصغيره اللى عندها 18 سنة مشكلة علشان تحلها؟
طيب دى حاجة انا علقت عليها فى فكرة المدونة وقلت
انى ان شاء الله سايبة الكومينتس مفتوحة علشان ما يبقاش اللي بعت مشكلة هايشوف حل من وجهة نظره حل بنت صغيرة وخبرتها مهما كانت قليلة فلما الكومينتس تبقى مفتوحه هايبقى عنده فرصة ان ياخد اكتر من حل من اكتر من شخصية واكتر من سن وانواع مختلفة من الناس وخبرات متعددة لان مش هايبقى حلى لوحدى هايبقى حل من كل انسان يتفضل ويقدم حل متوسم فيه خير
ونوهت انى مش هامسح اى تعليق الا لو كان فيه حاجة تضايق صاحب المشكلة او بمعنى اصح السباب لصاحب المشكلة او للمشكلة فى حد ذاتها او ليا
ثانيا: انتى شخصية معروفه والناس تحب تقول اسرارها لشخص مايكونش يعرفهم ويعرفوه انما انتى خلاص اندمجتى مع الناس
مش عارفه انا مش حاسه انى شخصية معروفه بالمرة وبعدين انا ماحدش عارف انا مين ولا انا اعرف اى حد يبقى مين الا ناس معدودين ودول اللى قالوا اسمائهم ومش عارفين شخصياتهم الحقيقية كمان فحكاية ان حد يعرف حد دى نادرة
كمان هانقول انه ماشي فيه شخصية تدوينية لكل حد هايكون خايف عليها او خايف ان صورته تتهز قدام المجتمع التدوينى ومجموعة المدونين اللى هو هايبقى خايف على صورته قدامهم
فى دى هاقول
ان ده راجع لامانتى
طيب
الانسان اللى باعت المشكلة ده مش هايبقى واثق فى امانتى لانه ما يعرفنيش
انا بحب التفكير المنطقى اللى هو واحد زائد واحد يساوى اتنين
وده مجرد مثال للتوضيح
بما انى عاملة مدونة علشان الناس تبعت مشاكلها وتلاقى حلول ليها من ناس تانية يعني فى الاول والاخر المدونة معتمده على الناس مش عليا لان الناس هاتبعت والناس هاتساعد والناس ها ترد لو انا فقدت عامل الثقة يبقى انسى كل الناس يبقى اكيد انا هحافظ على الثقة دى
بسيطة صح
ثالثا: لما ابعتلك مشكلة من ايميلى هتعرفى ايميلى وده هيحسس اى حد انك ممكن تعرفيه بينما صاحب المشكلة بيحب يكون مجهول على طول
طيب انا اعرف اى مدون كاسمه على المدونة وكمدونته مش عارفه ايميله ده لو كان ليه ايميل واحد بس اصلا فحكاية الايميل دى مش حاجة تهدد لانه انا مش هاقدر اربط كل ايميل بالمدون صاحب المشكلة
ونفترض انه بعت من ايميل له علاقة بالمدونة
طيب وايه المشكلة انا كده كده مش هاكتب اى حاجة تدل على هوية صاحب المشكلة اما لو عن ان صاحب المشكلة هايكون قلقان من نظرتى الشخصية فانا واحدة بس في ملك فمش مهمه اوى
غير كده انا نظرتى لاى حد مش هاتبقى من مشكلة واحدة ايا كانت وايا كانت عواملها نظرتى للانسان نظرة شاملة يعني انا هاحكم على الانسان من حياة كامله ده غير ان الانسان من لحظة للتانية بيتغير فمش حاجة مهمة انى اعرف هوية صاحب المشكلة
هانقول طيب انها مشكلة ممكن تبقى اخلاقية وهو نوع المدونين اللى ممكن يبقى ظاهر بصورة متدينة فهايكون خايف على مصداقيته
هاقول كل ابن ادم خطاء وخير الخطائين التوابون واللى يقول ان فى انسان ما بيغلطش ده شخص ليه اوصاف كتير اقلها انه مش عاقل ومالوش خبرة فى الحياة فبرضه عاااااااااااااادى
رابعا: ......ودى مسألة فنية وهى القدرة على جذب الجمهور ودى كارزما وموهبه
حكاية جذب الجمهور دى فبصراحة انا مافكرتش فيها يعني انا سايبة المدونة مع الوقت هاتتعرف وهايبقى لها مكانتها ومصداقيتها مع الناس
اما الكارزما فدى زى ما حضرتك قلت هى موهبة ربانية وما اظنش ان اللى عنده مشكلة هايبقى عايز حد عنده كاريزما علشان يحلها له هو اكيد هايبقى محتاج حد عاقل وتفكيره منظم وشخصية مسؤولة اكتر من انه يكون شخصية كاريزماتيك
وفى الاخر احب اقول لاخى الباحث عن الحقيقة اكيد متشكرة جدا
وجزاك الله خيرا على اهتمام حضرتك بمساعدة مدونة مشكلة وحلها
Subscribe to:
Post Comments (Atom)
7 comments:
ربنا يعينك انت فعلا حساسة وذكية
بس أنصحك بتنمية هذه المواهب بالمعارف المتنوعة والمجال أمامك كبير فعلا إن شاءالله لأن عندك وعي عالي
وفعلا لو أحد طرح مشكلة سوف نساهم جميعا بالنصيحة
عصفور المدينة
جزاك الله خيرا كثيرا
بس ياريت تتم النصيحة وتقول لى المعارف دى زى
علشان ان شاء الله انا عايزة بصراحة
وانا واثقة ان شاء الله ان كل المدونين هايساعدوا لانى الحمد لله متوسمة فيهم كلهم خيرا
أختي الفاضلة
أفضل المعارف القرآن الكريم والسنة
النبوية والعلم الشرعي
لأنه كما قيل شرف العلم من شرف المعلوم
ويتبعها كافة أنواع المعرفة وهذا بخلاف تخصصك الذي ينبغي أن تكوني مبدعة ومتقنة فيه
ثم عليك بعد ذلك أن تنوعي في المسائل الفكرية وتقرئي للآخرين وتأخذي من كل علم بطرف والحكمة ضالة المؤمن
لكن أهم شيء هو المهجية وطول النفس يعني إذا بدأت كتابا تتميه وإذا بدأت شيئا تكمليه ووضع أهداف طويلة
وعنصر هام في ذلك أن تعلمي كما قلت في التعليق السابق ألا تكتفي بتلك الموهبة وتلك النعمة التي وهبك الله إياها من نقاء الذهن والعاطفة المتوقدة
وعليك قبل كل ذلك بالدعاء لله سبحانه أن يعلمك
اللهم رب جبرائيل وميكائيل وإسرافيل فاطر السموات والأرض عالم الغيب والشهادة أنت تحكم بين عبادك فيما كانوا فيه يختلفون اهدني لما اختلف فيه من الحق بإذنك إنك تهدي من تشاء إلى صراط مستقيم
كلنا أصحاب مشاكل
وإن شاء الله كلنا كما تتوسمين أهل نصح
توكلى على الله وإن شاء الله تكون المدونة متنفسا لأصحاب القلوب المرهقة واستراحة لأصحاب العقول المتعبة
موضوع السن والخبرة دة مش معضلة ممكن بالخبرة والتعامل مع المواقف المتكررة تتلاى القصور
موضوع إن حد يخاف يتعرف
إحنا فى مجتمع إفتراضى على النت ومش مشكلة إن بعضنا معروف بالعكس ممكن ده يساعد فى إضافة مصداقية على النصيحة
عصفور المدينة
جزاك الله خيرا حضرتك بجد افدتنى بس ادعى لى بالهداية :)
طال الليل
جزاك الله خيرا
على فكرة انا كنت كتبت التعليق ده فى مدونتك الاولى وحذفته خفت تعتبرينى بعملك احباط او حاجة
ثانيا كنت اتمنى انك تخبرينى انك ناقشتى تعليقى ده فى موضوع مستقل وانك استفتحتى بكلامى فى المدونة علشان على الاقل اقدر اوضح بعض كلامى وفكرتى
اللى انتى قلتيه ده كله اجابات معروفة وكلنا عارفينها وكلنا عارفين ان ده عالم افتراضى والواحد مننا له اكتر من ايميل وان مستحيل الربط بين الايميل وبين صاحب المدونة وبالتالى هيفضل مجهول
ومع ذلك نسأل نفسنا: طب ليه لغاية دلوقتى محدش ارسل مشكلة رغم ان كلنا مشاكل زى ما قال طال الليل
عموما اختى الفاضلة امام اصرارك ده على النجاح راح اقيم مع حضرتك ورشة عمل من خلال التواصل عبر ايميل المدونة لانى اعتقد ان عندى وجهة نظر لعمل المدونة وان شاء الله بالتوفيق للجميع
وادعوكى لزيارة موضوعى الاخير فى الاستراحة لانه بيتكلم عن ازاى تكون كاتب مبدع
الفكرة جميلة
انا كنت جربتها قبل كده ونجحت بس على منتدى
كملى و على بركة الله
السلام عليكم
Post a Comment