فكرة المدونة

بسم الله الرحمن الرحيم

والحمد لله رب العالمين والصلاة والسلام على أشرف المرسلين سيدنا محمد وعلى آله وصحبه أجمعين
أما بعد

طبعا اسم المدونة موضح فكرتها بس أوضح اكتر

كل حد بييجي عليه وقت ويبقى محتاج صديق يحكى له على مشكلة مؤرقاه وطبعا المشكلة دي ممكن تبقى خاصة أو عائلية أو الحد ده عمل مصيبة يعني أيا كان بيبقى عايز يحكيها لصاحبه ويحلها معاه ويا ريت لو صاحبه بعد كده يفقد الذاكرة علشان ما يفتكرش المشكلة دي لأنها ممكن تبقى سر ده مش ممكن ده في الغالب بتبقى أكيد سر

وبما إن الواحد مش ضامن اللي صاحبي النهاردة ممكن يبقى بكرة من ألد أعدائي أو يبقى هو ألد أعدائي أصلا

فأنا فكرت في المدونة دي ها تبقى حاجة كده زى بريد الجمعة بتاع جريدة الأهرام بتاع الأستاذ عبد الوهاب مطاوع الله يرحمه و الإيميل بتاعها على اليمين ها تلاقوه اللي عنده مشكلة يبعتها وبالظبط زى بريد الجمعة ها يكون المشكلة وتحتها الرد عليها وطبعا التعليقات هاتكون مفتوحة يعني كل حد يقرأ المشكلة ويلاقى إن عنده ليها حل متوسم فيه خير يكتبه وصاحب المشكلة ياخد انسب الحلول سواءا من ردى أو من التعليقات وبكده يبقى جمع اكبر قدر من الحلول وزى ما بيقولوا لا خاب من استشار ولا ندم من استخار فإحنا ها يكون علينا استشار والاستخارة بقى دي تبقى بينه وبين ربنا

وطبعا فيه نداء لكل إنسان عايز يستفز صاحب المشكلة أو صاحبة المدونة يا ريت الله يكرمك أعفينا من تعليقاتك لو عندك كلمة طيبة وحل مناسب اكتبه ولو مش عندك يبقى صمتك أفيد للجميع والرحمة حلوة برضه

ويا جماعة أنا ولا عامله نفسي مصلحة اجتماعية ولا فاكرة نفسي أم العريف ولا بيتهيألى إني حكيمة زماني والكلام ده اللي أكيد ناس ها تقوله أيا كانوا

أنا لو صغيرة في السن فتأكدوا إن خبرتي كبيرة أوى اكبر من سني و بعدين صاحب المشكلة مش ها يكون قدامه الحل بتاعي أنا وبس لا ده ها يكون قدامه حلول من كل الأنواع والأشكال والأعمار لأني ها سيب التعليقات مفتوحة

وإعلان هام

أي حد ها يقول كلام مش كويس أو يشتم أو أي تعليق مهين لصاحب المشكلة أو ليا أنا أو حتى للمدونة أنا ها حذفه مع إن مش من مبادئي حذف التعليقات بس ده ها يكون رحمة ورفقا بصاحب المشكلة اللي عادة لما بيبقى حد في مشكلة بيكون حساس جدا وسهل إن مشاعره تتجرح

إن شاء الله ها يكون فيه نشر لمشكلة في الأسبوع ده لو أنا مشغولة موووووووووت ولو أنا فاضية فها تبقى على قدر ما ربنا يقدرني إن شاء الله

والمدونة دي من باب من فك كربة مسلم وإدخال السرور على قلب مسلم

والله المستعان