Wednesday, August 22, 2007

فكرة المدونة

بسم الله الرحمن الرحيم

والحمد لله رب العالمين والصلاة والسلام على أشرف المرسلين سيدنا محمد وعلى آله وصحبه أجمعين
أما بعد

طبعا اسم المدونة موضح فكرتها بس أوضح اكتر

كل حد بييجي عليه وقت ويبقى محتاج صديق يحكى له على مشكلة مؤرقاه وطبعا المشكلة دي ممكن تبقى خاصة أو عائلية أو الحد ده عمل مصيبة يعني أيا كان بيبقى عايز يحكيها لصاحبه ويحلها معاه ويا ريت لو صاحبه بعد كده يفقد الذاكرة علشان ما يفتكرش المشكلة دي لأنها ممكن تبقى سر ده مش ممكن ده في الغالب بتبقى أكيد سر

وبما إن الواحد مش ضامن اللي صاحبي النهاردة ممكن يبقى بكرة من ألد أعدائي أو يبقى هو ألد أعدائي أصلا

فأنا فكرت في المدونة دي ها تبقى حاجة كده زى بريد الجمعة بتاع جريدة الأهرام بتاع الأستاذ عبد الوهاب مطاوع الله يرحمه و الإيميل بتاعها على اليمين ها تلاقوه اللي عنده مشكلة يبعتها وبالظبط زى بريد الجمعة ها يكون المشكلة وتحتها الرد عليها وطبعا التعليقات هاتكون مفتوحة يعني كل حد يقرأ المشكلة ويلاقى إن عنده ليها حل متوسم فيه خير يكتبه وصاحب المشكلة ياخد انسب الحلول سواءا من ردى أو من التعليقات وبكده يبقى جمع اكبر قدر من الحلول وزى ما بيقولوا لا خاب من استشار ولا ندم من استخار فإحنا ها يكون علينا استشار والاستخارة بقى دي تبقى بينه وبين ربنا

وطبعا فيه نداء لكل إنسان عايز يستفز صاحب المشكلة أو صاحبة المدونة يا ريت الله يكرمك أعفينا من تعليقاتك لو عندك كلمة طيبة وحل مناسب اكتبه ولو مش عندك يبقى صمتك أفيد للجميع والرحمة حلوة برضه

ويا جماعة أنا ولا عامله نفسي مصلحة اجتماعية ولا فاكرة نفسي أم العريف ولا بيتهيألى إني حكيمة زماني والكلام ده اللي أكيد ناس ها تقوله أيا كانوا

أنا لو صغيرة في السن فتأكدوا إن خبرتي كبيرة أوى اكبر من سني و بعدين صاحب المشكلة مش ها يكون قدامه الحل بتاعي أنا وبس لا ده ها يكون قدامه حلول من كل الأنواع والأشكال والأعمار لأني ها سيب التعليقات مفتوحة

وإعلان هام

أي حد ها يقول كلام مش كويس أو يشتم أو أي تعليق مهين لصاحب المشكلة أو ليا أنا أو حتى للمدونة أنا ها حذفه مع إن مش من مبادئي حذف التعليقات بس ده ها يكون رحمة ورفقا بصاحب المشكلة اللي عادة لما بيبقى حد في مشكلة بيكون حساس جدا وسهل إن مشاعره تتجرح

إن شاء الله ها يكون فيه نشر لمشكلة في الأسبوع ده لو أنا مشغولة موووووووووت ولو أنا فاضية فها تبقى على قدر ما ربنا يقدرني إن شاء الله

والمدونة دي من باب من فك كربة مسلم وإدخال السرور على قلب مسلم

والله المستعان

18 comments:

mohand said...

السلام عليكم

الفكرة جميله في اصلها
وان شاء الله تكون اجمل في تفصيلها
سلام

ftataljanna said...

mohanad

اول تعليق فى اول موضوع فى المدونة

ميرسي يا استاذ مهند ربنا يبارك فى حضرتك ادعى لى

عصفور المدينة said...

يا رب يسر

الراقـــص مع الذئـــــاب said...

السلام عليكم
اختي فتاة الجنة
اتمني لكي التوفيق في مدونتك الجديدة والفكرة الجميلة التي تحتويها
جزاكي الله خيرا

ftataljanna said...

عصفور المدينة

ياااااااااارب

الراقص مع الذئاب

حمدا لله على السلامة يا كابتن :)
وجزاكم مثله

Future_Preacher said...

جزاكي الله خير
ان هذا دل علي شيء فإنما يدل علي شخصية رقيقة تشعر بالاخرين و تشاركهم احزانهم
بارك الله فيكي
و علي فكرة حتلاقي زباين كتير قوي لأن مع الاسف كلنا مكروبين ...ومع الاسف ليه
و الله الحمد لله كله تخفيف من أثقال ذنوبنا و مادام في ناس زيك ممكن نفضفضلهم اكيد الحياة حتكون احلي
:)
ربنا يوفقك ان شاء الله

انكسارات .. احمد البوهى said...

فكرة جميلة جدا وعميقة الى اقصى مدى
....
جزاك الله خيرا
الى الامام دائما

الطائر الحزين said...

ربنا ييسر لك الحال

بس مش عارف الموضوع له توابع كثيرة بس مش عارف احددها

تحياتى يسر الله لك

ابن حـجـر الـعـسـقـلانـى said...

ما شاء الله .. فكرة جميلة جدا .. جعلها الله فى ميزان حسناتك
يقول الرسول صلى الله عليه و سلم فى حديث ما معناه: من فرج على مسلم كربة من كرب الدنيا فرج الله عليه كربة من كربات يوم القيامة

جميل جدا أن نكون إيجابيين .. أحييكى بالفعل على الفكرة و أعان الله الجميع على أداء النصيحة

ftataljanna said...

future preature

جزاكى الله خيرا

inksarat

جزاك الله خيرا

الطائر الحزين
توابع ازاى ؟

ابن حجر العسقلانى
جزاك الله خيرا

الباحث عن الحقيقة said...

فكره عظيمة جدا
يا بختك بالفكره
هايله فعلا
ربنا يوفقك

ftataljanna said...

الباحث عن الحقيقة

بس لسه المدونة مش معروفه علشان حد يستفيد منها

مشروع انسان said...
This comment has been removed by the author.
مهبول ومهبوله said...

فكره جميله ومريعه بجد


ربنا يوفقك وفعلا اللى هيشوف بلوه غيره تهون عليه بلوته

ahmed mefrh said...

جميله فكره المدونه
اعزكم الله

ftataljanna said...

مهبول ومهبولة

جميلة ومريعة :)
جزاكم الله خيرا


ابو مفراح

وجزاكم مثله واعزكم

ميّويه said...

السلام عليكم
فكرة رائعة يا فتاة الجنة إحنا فعلاً في زمن محدش مننا معندوش مشاكل..زجزاكِ الله خيراً ..ويارب أكون أختك في الله

ftataljanna said...

maiooia

ربنا يخليكي

اكيد دى حاجة تفرحنى انك تكونى اختى فى الله

ربنا يكرمك يا رب يا ميوي يا جميل :)

ولما تيجي مشاكل مستنيين رايك